Kembang Balébat

Ku: Ki Sunda Sawawa

Bagéa kembang balébat
Di taman mandalapurwa
Naon bacaeun ayeuna
Maca beurang.. ku beurangna
Ngaji peuting.. ku peutingna
Dereseun na papantunan

Da hirup ngan sakolépat
Di udag udag balébat
Ditutur tutur ku layung
Ngalungsar diperjalanan
Engké atawa isukan..
Duka téh teuing...

Di langit Bandung Bulan keur mayung

ku Ki Sunda Sawawa

Jang peuting geus ngalingkup
Ngarungkupan dayeuh bandung, anu hibar sinar lampu

Panto haté geus narutup
Mipindingan kawih asih, anu halon tur halimpu..

Geus paanggang geuning urang pajauh
Rek kasaha diri nyungkem nyalu'uh

Nu disungsi geuning nu diteangan
Duh ieung teu tembong tembong, geuning taya ngiberan

Di lalangit.. langit bandung
Ngempur hurung, bulan keur mayung..

Di lelemah.. lemah bandung
Kapidandung... kapidangdung..diri ditundung...

Hariring Nu Kungsi Nyanding

Ku: Ki Sunda Sawawa

Purnama nu kungsi nyanding
Ayeuna urang ditepangkeun deui
Anu kungsi kapiati
Kiwari datang ka buruan deui

Hariring nu kungsi nyanding
Ayeuna datang ngahaleuang deui
Hayu pataréma leungeun
Cacapkeun meungpeung aya kasempetan

Ayeuna mangsa nu éndah
Hayu urang suka bungah
Caang bulan opat belas
Narawangan ati bangblas

Pupuh Asmarandana

 ku: Ki Sunda Sawawa

( lagu keur barudak )

Lagu ka 1

Éling-éling mangka éling
Rumingkang di bumi alam
Darma wawayangan baé
Raga taya pangawasa
Lamun kasasar lampah
Napsu nu matak kaduhung
Badan anu katempuhan

lagu ka 2

 
Eling-eling murangkalih
Kudu apik jeung berséka
Ulah odoh ka panganggo
Mun kotor geuwat seuseuhan
Soéh geuwat kaputan
Ka nu buruk masing butuh
Ka nu anyar masing lebar

lagu ka 3

Nu rujit mawa kasakit
Mawa cela ka salira
Katénjo ku batur awon
Tungtungna urang dihina
Ku pada babaturan
Batur téh geus tangtu embung
Babarengan eujeung urang