Perang Diponegoro II - Heureuy urang Forum

Guru : Cing jang Asép.. ari perang Diponegoro téh dimana..??
Asép : Éta bu di halaman 24 buku IPS kelas 2 SMA.. ( bari teu kireum kireum )

Guru : Aéééééééépppp... matak kudu daék ngapalkeueueueueueun siah ... kahareup .. !!!!! .. tuh bareng jeung kai Ikbal, da sarua odobna...

Asép : Nuhun bu.. aduh mani bageur miwarang abdi ngadeg dipayun ( bari ngengklak... )



hahahaahh ... dasar..

Ku : Kisunda Sawawa

Heureuy Ki Sunda - Bidan Teu Propesional

Ki Sunda : Kasebeleun pisan bidan teh, pamajikan urang rek ngalahirkeun teu ditarima, kalah sina balik deui...

Abah Kabayan : Naha bidan teh teu propesional pisan, make teu ditarima sagala..??Ki Sunda: Enya... cenah da karek oge nyiram...

Abah Kabayan : jurig atah teh… boro dihaminan.. ( bari nyusutan leho )

Kalakuan nu Pesbukan

Ku  Ki Sunda Sawawa

 

Lamun pirajeunan nitenan nu keur pesbukan mun tea mah di kamera, estu matak pikaseurieun, sabab dibandungan teh pasemonna : mimitina bebelengehan sorangan, tuluy nyikikik, teu lila ti dinya tuluy nyakakak, kadieunakeun reketek baeud jiga nu mangih kaambek, ahirna mah nginghak weh ceurik. Padahal nu maturan teh ngan ukur monitor jeung bungbengna kalimat anu rabeng ti ditu ti dieu.

Malahan mah sakali waktu aya anu ceurik meureunan tarik teuing, antukna mani rabul tatangga anu deukeut nepungan da bisi pasea jeung dulurna..

hehehe... dasar piseurieun wungkul..

Salah Nginum

Ki Sunda Sawawa

Abah Kabayan : ki abah mah sakitu unggal poe nginum Jajamu, angger we geuning awak teh mani laleuleus..

Kisunda : dasar belegud..lain nginum jajamu atuh bah lamun awak hayang hareuras mah..

Abah Kabayan : Na kudu nginum naon atuh ki.. cing abah bejaan ..

Kisunda : coba geura nginum air keras geura... moal teu jadi hareuras tah awak teh.

Abah Kabayan : Gustiiii.... na ari abah beunang katipu wae..!!
( bari garo garo teu ateul )

Kisunda : tapi wajar bah, da abah mah " Indo " , jadi moal pati ngarti

Abah Kabayan : oh kitu kutan.. enya da abah mah turunan Indo.. ( bari rada marahmay )

Kisunda : heheh... enya bah.. campuran antara bodo jeung belegug..

Abah Kabayan : Tobaaaaaaaaaatttt.....!!!!!!!!!
( bari aya anu kaluar balon tina liang irungna )

Silih Taur

Coretan Ki Sunda Sawawa

Kacaritakeun aya saurang paninggaran keur moro bagong, di kebonna salah saurang patani. Bari nungguan boroannana, manehna kukurilingan neangan tempat anu merenah, tapi lain keur nyumput, tapi manehna teh hayang ngendog, da kabuktian sabada manggihan tempat anu merenah, jol gejlek manehna teh ngaluarkeun endogna. Ma'lum anu pangseng, eta endogna teh mani ampir sagede bal beliter.

Ari ngendogna teh kabeneran dina kebonana patani anu teu resep sama sakali lamun aya jelema anu ngadon ngendog dina kebonna.

Harita oge basa kapanggih aya paninggaran anu ngendog teh jol pudigdig we ambek, ngan basa rek nyarekan eta patani teh ngarengkog, sabab sieuneun ditembak ku paninggaran.

Kacaritakeun eta patani teh bari rada ngagidir nyampeurkeun ka paninggaran, pok manehna nanya : keur naon jang.. ??
Panginggaran ngajawab : eta bah nuju moro bagong..!!
Tiasa abah ninggalan bedil.. jigana mah alus tah..??
Paninggaran : Mangga bah bade ningalan mah..!!

Gep we eta bedil teh ku patani dicokot, tuluy diilik ilik.. na atuh ari geus kitu, eta bedil teh ditodongkeun ka paninggaran, bari ngomong : silaing anu ngendog teh..?? ( bari muncereng )

Paninggaran kacida reuwaseunnana, pok manehna ngajawab : muhun bah..!! na kumaha kitu..?? ( bari raga ngeleper da sieun di tembak )

Ceuk patani bari nodongkeun bedilna : hakan siah...!!!!...

Panggaran : ah.. nu leres bah.. piraku abdi kudu ngadahar endog sorangan... !! ( bari murungkut )

Patani : eh... hayang ditembak siah.. !! ( bari terus nodongkeun bedil )

Eta paninggaran mani burial buncelik sabab ambek nyedek tanaga midek, ari rek ditolak sieun dibedil, ari digugu, asa piraku kudu ngadahar endog sorangan, mangkanng sakitu nampuyakna..

Tapi da sieun cilaka, eta paninggaran tuluy we nyoelan endogna saeutik saeutik bari teu kuat hayang ongkek..

Ceuk patani : kudu loba loba siah ngadaharna...!! ( bari molot )

Tungtungna mah, bari teu kuat oge, eta endong sorangan teh teu burung we beak..

Ceuk paninggaran : tah bah.. kusabab abdi tos nyeepkeun endogna, cing eta bedil teh ayeuna mah ka abdikeun..

Teu panjang pikir eta patani teh song we mikeun bedilna ka paninggaran.
Sanggeus katarima, teu antaparah deui eta paninggaran teh nodongkeun bedilna ka patani bari nyarita : ngendog siah...!!!

Eta patani mani reuwas luar biasa, sabab teu nyangka bakal malik ka sorangan..
ceuk patani : ah sujang da abah mah teu hayang ngendog deuleun...!! ( bari rek ceurik.. )

Paninggaran : Paksakeun siah...!!

Atuh eleh deet eta patani teh ngendog sagejlek, da sidik keur teu hayang..
Paninggaran : hakan siah...bisi ku aing di tembak..

eta patani mani sujud kana suku paninggaran supaya teu tulus ngadahar endogna..

Paninggaran : gancang siah hakan... !! bisi ditembak ku aing..!!

Tungtungna mah eta patani ngarawu endogna, da ngan saeutik, maksudna mah rek disamualkeun..

Paninggaran : eutik eutik siah....

Atuh kapaksa we anu tadina rek disamualkeun teh jadi dieutik eutik da sieun..

Sanggeus beak, eta paninggaran ngomong ka patani : lunas bah...!! ( bari ngaleos )

Eta patani, sanggeus euweuh sasaha, tuluy we utah uger aya mingguna...

cag... hehe

Kandang Kosong

Ku : Kisunda

Kisunda : Bah.., minggu hareup urang ulin ka kebon binatang yu ??
Abah Kabayan : Aya naon kitu ?
Kisunda : Aya kandang kosong keur Abah..
Abah Kabayan : koplox siah..!!
Kisunda : heheh.. na atuh ari abah sok gancang katipeng wae

Wiwirang di kolong catang

Pangalaman Ki Sunda Sawawa

Harita mah, ka éra jeung kawirang aki, éstu teu aya tandingna, sabab di wiwirang budak satepak hareupeun jalma nu réa..

Harita téh aki rék indit ka banjaran, ngan teu kana kendaraan, da harita mah aki can boga kendaraan, ngadagoan ojég euweuh, tungtungna mah indit téh kapaksa leumpang.

Keur jongjon aki leumpang, karérét ku juru panon, aya duit 1000 pérak ngagolér, ngan harita mah, duit sarébu téh, masih kénéh aya hargaan.

Harita aki ngarandeg, bari rurat rérét sugan aya nu ngaliwat, maksud téh rék ngabéjaan aya duit. Kusabab katingalina teu aya sahaha, tuluy aki ngarongkong rék nyokot éta duit. Barang rék dicokot, éta duit téh bisa maju ku sorangan, harita mah aki teu loba mikir, da panyangka téh meureunan katiup angin. Barang rek dirongkong deui, éta duit téh ngagulusur deui, bari deuih sarurak tinu bala nyeungserikeun aki,..

Sihoréng simanahoréng, éta duit teh ditalian ku kenur, tuluy disimpen ditengan jalan, unggal aya anu ngaliwat rek nyokot duit, eta duit teh didudut...

Na da sanggeus aki apal......mani asa euweuh beungeutan... ari ras ku ka éra, sabab geuning dinu bala téh, lain saurang dua urang, tapi aya welasna, bari terus ngageuhgeuykeun aki...

Aki harita ngomong sorangan bari ngaléos... “euh... ieu meureun anu disebut ‘wiwirang di kolong catang’ teh.. "

Na da sababaraha minggu mah, aki teu wani ngaliwat ka lebah dinya, sabab asa can lipur tah ka éra téh,.......

Katipu atah atah

( Dongeng Ki Sunda Sawawa)

Baheula, basa aki keur resep keneh nguseup, sakapeung mah sok teu inget kana naon naon, tonggoy we cinekul di walungan atawa di balong, bari leuheung lamun sok beubeunangan mah, malahan sakapeung mah mindeng pasea jeung si nini, da kamalinaan teuing..

Harita oge, aki keur cinekul we di walungan, bari cingogo handapeun tangkal waru, bari can meunang sasiki siki acan, teuing teu aya laukan atawa eupanna anu goreng, malah harita mah rada oge aral, sabab ti isuk jedur nepi sore tomper, teu aya anu nyantok-nyantok acan.

Keur jongjon aki nguseup, torojol aya anu nyampeurkeun ka aki, jigana mah anu keur ngarit, da beda we keur ngajingjing arit. Pok manehna teh naya :
Ceuk anu ngarit : " Nuju nguseup ki..??
Aki ngareret bari nembal : " muhun jang, tapi poe ayeuna mah asa naas naas teuing ieu teh, sabab can beubeunangan..!!
Anu ngarit nanya deui : " ngangge naon ki eupanna..??
Aki ngajawab : " ah.. biasa we jang make cacing koot..!!
Ceuk nu ngarit : panginten atuh ki teu kekengengan, da eupanna awon..

Aki dikitukeun teh, rada reuwas, boa boa bener tah caritaan nu keur ngarit teh bener..
tuluy aki malik nanya : na ari eupan anu alus tina naon jang..?? ( semu daria da hayang dibejaan )

Ceuk nu ngarit : ah gampil ki, cekap ku siki salak diparud..!!
Aki beuki teu ngarti, sabab asa kakara ngadenge aya eupan lauk dijieunna tina siki salak, teus aki nanya deui.. " na dikumahakeun jang tah siki salak teh ..??
Anu ngarit ngajawab : siki salak teh di parud, teras dicampur sareng pecin, ngangge kecap we sakedik mah...!!

Aki mani atoh pisan ngadenge kitu teh, malah rek ngarencanakeun, isukan mah rek dicobaan make eupan tina siki salak, sugan we loba beunangna. Ngan aki panasaran, tuluy nanyakeun deui : " atuh jang meureun bangenan pisan nya..?? pasti lah loba anu nyangutna teh..??( bari cul we useup mah, da kataji ku obrolan..

Anu ngarit ngajawab bari ngaleos : nyeta ki teu aya nu nyangut hiji hiji acan....!!!!
Na da barang ngadenge jawaban kitu, aki mani asa kabentar gelap ereng erengan, keur mah nguseup teu beubeunangan, katambah aya anu nipu.... da lamun manehna teu keur mamawa arit mah, piraku teu digabrug tah jelema teh..

Saenggeusna kajadian kitu, aki mah tara nguseup nguseup deui, kapok sieun katipu deui...
Cag..

Pagede gede wadul

“ Heureuy Bandung “
( Didongengkeun ku Ki Sunda Sawawa )

Kacaritakeun, aya 4 urang tukang nguseup keur ngariung, bari pagede gede ngawadul :

Ceuk tukang nguseup 1 :
Kuring mah, kusabab eupanna alus, karek clom oge dialungkeun, jol kurunyud we disangut.
Ceuk tukang nguseup ka 2 :
Ah.. atuh alus keneh eupan anu kuring, karek dipintel pintel oge, eta lauk teh geus ratok , bari ngaromong “ enggal kang geura anclomkeun, kuring geus teu kuat yeuh hayang geura nyanggut..!! “

Ceuk tukang nguseup ka 3 :
Ah.. atuh eta oge, masih keneh goreng, nu kuring mah, karek nyieun eupan oge, lauk teh pating arajleng ka darat bari ngaromong : “ kang… wios ku kuring di sangut ayeuna, geus aral yeuh hayang geura nyanggut..!!

Ceuk tukang nguseup ka 4 :
Ah… kabeh oge goreng tah eupan teh, nu kuring mah, lamun poe minggu rek ngusep, tah malem mingguna teh, si lauk geus daratang ka imah bari ngaromong : “ kang ari enjing cios rek nguseup teh..?? omat ulah teu sumping, kuring geus teu kuat..!!
Tukang nguseup anu tiluan pating rareret bari ngaromong : “ ah .. teu sangka, geuningan gede pisan tah wadulna teh.. ( bari pating carakakak nepi ka seeleun )

Alat Paragi Ngukur Korupsi di Nagara

 

karya :Ki Sunda Sawawa

Anyar anyar ieu, ki sunda geus hasil nyiptakeun hiji alat anu mutakhir keur ngukur tingkatan korupsi di tiap nagara. Manéhna ngahaja nyieun eta alat, sabab dipesenan ku si abah kabayan. 

Éta alat téh kacida pisan akuratna dina ngukur badag jeung leutikna nu korupsi, cukup ningali jarum jam anu aya dina éta alat, bakal katingali sakumaha tingkatan korupsina. Lamun jarum jamna nunjukeun angka 10, ngandung harti éta nagara teh beresih tina korupsi, beuki turun angkana, beuki gedé tingkatan korupsina. 

Éta alat téh mimiti dicoba di Amerika, éta alat téh jarum jam na utek utekan, tuluy cicing dina angka 8. Barang ningali kitu, kang Obama nyengir kuda, bari terus ngomong ka para pajabatna :" Nagara urang téh geuning can beresih tina korupsina, kukituna perlu ditingkatkeun dina merangannana ".

Sanggeus beres di Amerika, éta alat téh dibawa ka Malaysia, barang diukur, éta alat téh jarumna nunjukeun kana angka 6. Sang raja bari ambek ambekan langsung marentahkeun rapat darurat keur nyawalakeun hal mahabuna korupsi di nagarana.

Terus éta alat téh di paké ngukur ka sababaraha nagara, hasila teh ampir sarua model Mlaysia, sarua deuih para pajabatna tihothat ngayakeun cara anu hadé keur merangannana.

Caritana eta alat téh dibawa ka Indonesia, tuluy diukur…..

Na atuh…… !! sarerea oge euweuh anu teu ngagebeg, sabab eta alat téh langsung ngabeledug bitu, jarumna ngajeprét bari hiber kaditu kadieu. Jeung teu kaharti deuih, make aya sora anu sasambat nyebut “ Tobaaaaaaaaaaaaaaaaaattt… Gusti .. abdi teu kiaaaaaaaaatt..!!

Barang kajadian kitu, reaksi ti para pajabat Indonesia, béda pisan jeung para pajabat di nagara luar, kalayan tenang , salah saurang pajabat teh ngomong ka sarerea, pokna teh : “ tenang..tenang.. ulah waka geumpeur, ieu mah diakibatkeun alatna anu teu baleg.. ( bari terus we ngabaraheuhay deui )
Harita aki jeung si abah silih pelong, dina haté masing-masing tanda tanya sagedé telebug, bari teu karasa bareng nyebut : “ woooooooooooooooww… kereeeeeeeeeenn..!!
Cag………hehehe

Nu Maotna Nu Sok Barang Penta

Karya : Ki Sunda Sawawa

Poe bieu mah, aki boga lalakon pikaseurieun, basa ngalongok anu maot, sabab aya salah saurang jalma anu ngadongeng pikaseurieun, pajarkeun teh cenah aya mayit anu leungeunna teu bisa disidakepkeun tuluy we namprak, sanajan geus sagala cara ditarekahan, angger we teu bisa. 

Tungtungna salah saurang kulawargana ngadatangkeun hiji kolot ...anu geus ahli dina cara ngurus mayit. Barang datang, eta kolot teh tuluy mariksa kaayaan mayit. Sanggeus rada lila eta kolot teh ngarewos ka salah saurang kulawargana : “ Cik jang.. aki menta duit sarebu..!!.. sanggeus dibere, eta duit sarebu teh ku si aki dikeupeulkeun kana leungeun mayit. Sarerea anu ningalikeun euweuh anu teu kerung, sabab teu ngarti naon maksudna.

Geus rada lila, si aki ngomong deui : “ Cing saha anu boga duit 50.000..??, sarerea ting rareret da teu ngarti rek dikumahakeun.

Caritana salah saurang anu ngalongok mikeun duit ka si aki, bari ngomong : “ yeuh ki.. anu abdi we tamut heula…!!.

Eta duit ku si aki dicokot, tuluy dikeupeulkeun kana leungeun mayit. Na atuh, sarerea oge euweuh anu teu ngarenjag bari bengong, sabab barang dikeupeulan duit 50.000, eta leungeun mayit.. jol gep weh ngeupeul duit, bari langsung sidakep.. Si aki nyerengeh bari ngomong 

: “ emh… dasar manehna mah keur hirupna tukang barang penta, geus maot oge masih keneh apal kana duit gede mah…!! Bari ngaheheh…

Eta anu diinjeuman duit tea, da lebareun meureun, tuluy nyoba nyoba nyokot duit anu dikeupeul ku eta mayit, tapi tibatan beunang mah, kalah ka ngesang nyokotna oge…

Anu boga duit kukulutus bari ngomong.. : “ si bedul teh…!!, aya bahan lapur tah duit teh…!! ( bari ngaleos ) …

Na da tungtungna mah sakur anu ngalongok, anu tadina ngahareruk teh jadi sareuri mani ngehkey, sok sanajan rada di tahan oge, da bisi eraeun kulawargana…

Si aki harita ngomong ka sarerea : " tah ayeuna mah, sok geura bungkusan, mengpeung duitna can lesot...!! " ( bari nyerengeh )

Cag…

Tokoh Legenda Tatar Pasundan

Hasil Coretan Ki Sunda Sawawa

1. SI KABAYAN
Mangrupakeun salah saurang tokoh sunda anu ngalagenda di masyarakat sunda, aweuhan ngaranna ti 19 abad ka tukang, geus jadi “ icon “ di Tatar Pasundan. Sosok na lugu, bodo,jeung pangedulan, ngan sagudang akalna. Lamun tea mah di titah ku pamajikan atawa mitohana, pasti we nyampak keur alesannana. Malahan ku Mang Koko Koswara mah, diabadikeun dina lagu, anu sya’irna teh diantarana :

Sikabayan ceritra rakyat pasundan..
Hei dongeng.. dongeng ki sunda.. tidak ada tapi ada
Orang bodo tapi pintar…..
Dimana nyi iteung ada si kabayan pun di sana..
… jeung saterusna…

2. NYI ITEUNG
Nyi Iteung teh, nya eta pamajikannana si kabayan. Matak disebut nyi iteung teh, pedah we rada hideung ( hideung santen mun ayeuna mah disebutna teh), sok sanajan geulisna ka wanti wanti endahna kabina bina, numatak ku si kabayan sok dilandi nyi iteung.
Nyi iteung henteu bodo model si kabayan, tapi sok mindeng dibobodo ku salakina ( si kabayan ) ..

3. SANGKURIANG
Mangrupakeun tokoh legenda Tatar Pasundan, anu aya patula patalina jeung sajarah Tangkugan Parahu, anu nyaritakeun anak ( sangkuriang ) bogoh ka indung ( dayang sumbi )
Ngan kusabab gagal dina nyieun parahuna ..sabab kaburu beurang ( akibat ditipu ku indungna ( dayang sumbi) nepi ka eta parahu teh ditalapung, ahirna nangkub nepi ka ayeuna (Tangkuban Parahu)

4. DAYANG SUMBI
Mangrupakeun tokoh legenda dina sajarah tangkuban Parahu ( saperti anu geus dicaritakeun dina lalakon sangkuriang )

( Hanca…. )

Sasakala Tangkuban Parahu

Hasil Coretan :Ki Sunda Sawawa 

Carita jaman baheula
Legenda di Tatar Sunda
Satria gagah perkasa
Pilih tandang pilih tanding

Sangkuriang teuneung ludeung
Rek nyanding putri nu geulis
Dayang sumbi rempan risi
Curiga eta putrana

Rek nolak nolak ka mana
Sangkuriang bakal maksa
Ngan ukur reka perdaya
Satria teu walakaya

Parahu anu diwangun
Teu parat kaburu beurang
Kongkorongok hayam jago
Megat niat sangkuriang

Kaduhung sagede gunung
Ati peurih meunang wiring
Langsung nalapung parahu
Nangkub nepi ka kiwari

Dongeng enteng Pasosore - Di Paseuk

Ku: Ki Sunda Sawawa

Baheula mah, mun barudak hayang kukudaan teh, teu jiga barudak ayeuna, sabab jaman kiwari mah geus loba kukudaan tina hoe atawa palastik.

Tah kacaritakeun jaman baheula aya budak anu ngarenghik ka indungna hayang kukudaan...eta budak ngomong ka indungna, ceuk budak : " ema uing hayang kukudaan ".. ceuk indungna : " ah.. sujang jeung carape kieu, na ari maneh teu ningali ema nyeri cangkeng urut ngabedug tadi beurang..?? ". Ngan kusabab budakna tuluy ngarenghik, indungna teh eleh deet, tuluy we nyarita ka anakna: " sok atuh sujang.. naek tah kana tonggong ema..!! ".., budakna atoheun pisan, jol terekel weh naek kana tonggong indungna. Ma'lum budak can bisa nyepeng pageuh,katambah deui baju indungna rada leueur, naek na teh teu kaur, da sorolok deui..sorolok deui. kitu jeung kitu we, nepi ka budaknaboseneun, tuluy ngomong ka indungna : " ema .. naha uing mah bosen, da teu daek cicing, tuluy we sosorodotan..!!" Indungna atoheun pisan, keur mah cape, bari ngomong ka anakna teh : " ceuk ema oge kumaha sujang, engke we ari maneh geus bisa muntang urang kukudaan deui..." Eta budak mikir kudu kumaha carana sangkan teu nyorosod.

Kaparengkeun eta budak teh manggihan indungna jeung bapana keur kukudaan, eta budak kaget satakerkebek, bari ngomong sorangan, Ceuk budak : " naha nya si bapa mah kukudaanana teu sosorodotan..? ", bari tuluy ngintip, barang katingali, anakna gogodeg bari ngomong : " paingan atuh si bapa kukudaannana tara nyorosod, da bujur si emana di paseuk ku si bapa...?????"

Eta indung bapana barang ningali ditukangeun aya anakna, mani tibuburanjat bari menerkeun samping, tuluy ngomong ka anakna : " Calutak siah kalakuan teh, bari peupeureudeuyan semu nu era..!!"  haaaaaaaahahahahahaha..